मिरी: संपूर्ण जिल्ह्यात प्रशासनाकडून रस्त्याचे कडेचे अतिक्रमण हटविण्यात येत आहे त्या अनुषंगाने पाथर्डी तालुक्यातील मिरी येथील रस्त्याच्या कडेचे अतिक्रमण अटविण्यासंदर्भात सार्वजनिक बांधकाम विभागाकडून अतिक्रमण धारकांना नोटीसा देण्यात आल्या असून संबंधितांनी आपले अतिक्रमण स्वतःहून काढून घेण्याच्या सूचना केल्या आहेत.

    त्या अनुषंगाने संबंधित अतिक्रमण धारकांनी रस्त्याच्या कडेला असलेले आपले अतिक्रमण स्वतःहून काढण्याचे काम हाती घेतले आहे. परंतु त्याचवेळी यातील बहुतांशी व्यवसायिकांनी रस्त्याच्या कडेला असलेले अतिक्रमण काढून बाजारतळावर मोकळ्या जागेत पत्र्याचे शेड व टपऱ्या मांडून पुन्हा अतिक्रमण केले आहे. त्यामुळे अतिक्रमण एकीकडे निघाले व दुसरीकडे पुन्हा झाले असे म्हणायची वेळ आली आहे. त्यामुळे मिरी येथील अतिक्रमणाचा प्रश्न जैसे थे राहण्याची शक्यता आहे.

    बाजार तळावर आठवडे बाजार भरविला जातो परंतु त्याच जागेवर व्यावसायिकांनी अतिक्रमण केले असल्याने आठवडे बाजार आता कुठे भरणार हा गंभीर प्रश्न ऐरणीवर येण्याची शक्यता आहे.

     तसेच याच ठिकाणी जिल्हा परिषदेची प्राथमिक शाळा देखील असल्याने अतिक्रमणामुळे गजबज वाढण्याची शक्यता आहे व त्याचा त्रास जिल्हा परिषद शाळेतील विद्यार्थ्यांना होण्याची शक्यता आहे. त्यामुळे स्थानिक प्रशासन यावरती काय भूमिका घेणार याकडे संपूर्ण ग्रामस्थांचे लक्ष लागले आहे.